غوره ذکر: سبحان الله، الحمد لله، لا اله الا الله

رسول الله صلی الله علیه وسلم مونږ ته خبر راکوي چې تر ټولو ښه ذکر: "لا إله إلا الله" دی، معنا دا چې له الله پرته بل حقیقي معبود نشته، او غوره دعا الحمد لله ده؛ چې معنا یې اعتراف کول دي پر دې چې لوروونکی هماغه الله پاک دی، هغه ذات چې د ښایسته او پوره ستاینې وړ دی.

ګټې

• د توحید په کلمې سره د الله تعالی په زیات یادولو ټینګار، او د الله په ستاینې (الحمد) سره دعا کول.

په HadeethEnc.com کې یې ولولئ

رسول الله صلی الله علیه وسلم فرمایلي دي چې الله جل جلاله ته تر ټولو محبوبې ویناوې څلور دي:

سبحان الله: دا له هر نیمګړتیا څخه د الله تعالی پاکوالی دی.

او الحمد لله: دا په بشپړ کمال سره د الله تعالی یادول دي؛ د هغه له محبت او لویۍ سره.

او لا إله إلا الله: یعنې دا چې له الله پرته په حقه بل معبود نشته.

او الله أكبر: یعنې تر ټولو لوی او تر هر شي عزتمن ذات دی.

او دا چې فضیلت او د ثواب ترلاسه کول یې په ترتیب سره تلفظ ته اړتیا نه لري.

ګټې

• د شریعت اسانتیا، یعنې دا چې هېڅ زیان نه رسوي چې لدې کلمو څخه دې په کومه یوه پیل وکړ.

په HadeethEnc.com کې یې ولولئ

رسول الله صلی الله علیه وسلم د دوو کلمو په اړه خبر ورکوي چې یو سړی یې له سختۍ پرته او په هر حالت کې ویلی شي او دا چې په تله کې یې اجر ډیر لوی دی، او دا چې زمونږ رب؛ رحمان ذات یې خوښوي.

سبحان الله العظيم، سبحان الله وبحمده؛ ځکه چې پدې دواړو کلمو کې الله تعالی په لویۍ او کمال سره یاد شوی، او له نقص څخه یې پکې پاکي بیان شوي ده.

ګټې

• ترو ټولو ستر ذکر هغه دی چې په هغه کې د الله تعالی پاکۍ او پرې ثنا ویل یو ځای شوي وي.
• پر بنده ګانو باندې د الله تعالی د لوی رحمت بیان، هغه ذات په لږ عمل باندې زیات ثواب ورکوي.

په HadeethEnc.com کې یې ولولئ

رسول الله صلی الله علیه وسلم خبر ورکوي چې په دې سترو کلماتو سره د الله جل جلاله یادول له دنیا او څه چې پکې دي غوره دي او هغه (کلمې) دا دي:

"سبحان الله": له نیمګړتیاوو څخه د الله جل جلاله پاکوالی.

"الحمد لله": له محبت او تعظیم سره د کمال په صفتونو د هغه ستایل.

"لا إله إلا الله": له الله جل جلاله پرته بل حق معبود نشته.

"الله أكبر" الله جل جلاله له هر شي لوی او ځواکمن دی.

ګټې

• د الله جل جلاله په ذکر ټینګار، او دا چې د الله ذکر له هر هغه څه نه غوره دی چې لمر پرې راختلی.
• ډېر ذکر ته هڅول؛ د ثواب او احسان په وجه.
• د دنیا خوندونه لږ او شهوتونه یې له منځه تلونکي دي.

په HadeethEnc.com کې یې ولولئ

رسول الله صلی الله علیه وسلم فرمایلي دي، څوک چې په ورځ کې سل ځلې «سبحان الله و بحمده»: ووایي؛ د هغه ګناهونه به وبخښل شي او له مینځه به لاړ شي، که څه هم د سمندر د پاسه د سپین ځګ په څېر زیات وي؛ کله چې په څپو او هیجان راشي.

ګټې

• دا اجر د هغه چا لپاره دی چې دا ذکر د ورځې په پرلپسې یا متفرقه ډول وکړي.
• (تسبیح) له نیمګړتیا څخه د الله تعالی پاکوالي او (حمد) له محبت او تعظیم سره د هغه یادولو ته وایي.
• په حدیث کې له ګناهونو بخښلو څخه مراد واړه ګناهونه دي او کوم چې لوی (کبیره) ګناهونه دي نو هغه له توبې پرته نه بخښل کیږي.

په HadeethEnc.com کې یې ولولئ

پیغمبر صلی الله علیه وسلم خبر ورکوي چې څوک ووایي: «سبحان الله» یعنې د الله پاکي بیانوم «العظیم» هغه ذات چې په ذات، صفاتو او افعالو کې تر ټولو لوی دی، «وبحمده» یعنې د هغه له ستاینې سره یو ځای، نو هر ځل چې دا جمله وايي، په جنت کې ورته یوه د خرما ونه کېښودل کېږي.

ګټې

• پرله پسې د الله تعالی ذکر ته هڅوونه چې له جملې څخه یې تسبيح (سبحان الله) او تحمید (الحمد لله) دي.
• جنت پراخه دی، او کښتونه یې تسبيح او تحمید دي، دا د الله تعالی له لوري فضل او نعمت دی.
• په حدیث کې په ځانګړې توګه د خرما د ونې یادونه شوې، نه نورې ونې؛ ځکه چې ګټې یې ډېرې او مېوه یې ښایسته ده، له همدې امله الله تعالی په قرآن کې د مؤمن او د هغه د ایمان مثال د خرما له ونې سره ورکړی.

په HadeethEnc.com کې یې ولولئ

د بانډې یو اوسېدونکي له رسول الله صلی الله علیه وسلم څخه پوښتنه وکړه چې یو ذِکر وروښایي چې ویې لولي، نو رسول الله صلی الله علیه وسلم ورته وفرمایل چې: ووایه: "لا إله إلا الله وحده لا شريك له" د عبادت حقدار نشته دی مګر یو الله دی چې شریک نه لري، نو د الله په یووالي له ګواهۍ ورکولو یې پیل وکړ، او معنا یې دا ده چې له الله پرته په حقه بل معبود نشته، "الله أكبر كبيرًا"

الله لوی دی په لوی والي سره. یعنې: الله له هر شي نه لوی دی. "والحمد لله كثيرًا"

او الله لره زیاته ستاینه ده یعنې الله لره ډیره ستاینه ده، د هغه په صفتونو، فعلونو او هغو نعمتونو سره چې - د ډیروالي له امله - نه شمېرل کیږي. "سبحان الله رب العالمين"

پاکي ده الله لره چې د مخلوقاتو رب دی. یعنې: له هرې نېمګړتیا څخه پاک او سپېڅلی دی، "لا حول ولا قوة إلا بالله العزيز الحكيم"

له ګناه څخه ګرځېدل نشته او د نېکو کارونو توفيق نشته مګر د الله په مرسته چې غالب او حکیم ذات دی. یعنې: له یو حال نه بل حال ته اوړیدل نشته مګر د الله په مرسته او توفیق سره. نو هغه سړي وویل: دا کلمې خو مې د رب د یادولو او لویۍ بیانولو لپاره شوې، نو د خپل ځان لپاره په څه سره دعا وکړم؟ نو رسول الله صلی الله علیه وسلم ورته وفرمایل چې: ووایه: "اللهم اغفر لي"

ای الله ما ته بخښنه وکړې. د ګناهو په بخښلو او پټولو سره، "وارحمني"

او په ما رحم وکړې ما ته د دیني او دنیاوي ګټو په رسولو سره، "واهدني"

او ماته لارښوونه (هدایت)

وکړې. غوره شرایطو او سمې لارې ته، "وارزقني"

او ماته رزق راکړې. حلال مال، روغتیا، او هره نیکمرغي او عافیت.

ګټې

• د الله جل جلاله یادولو ته په تهلیل (لا اله الا الله)، تکبیر (الله)، تحمید (الحمد لله) او تسبیح (سبحان الله) وېیلو سره هڅونه.
• له دعا څخه مخکې د الله جل جلاله یادول او ثنا پرې وېیل.
• د انسان لپاره مستحب دي چې په غوره دعاوو او هغه څه سره چې د رسول الله صلی الله علیه وسلم څخه راپاتي وي دعا وکړي، هغه چې د دنیا او آخرت ټولې ښېګڼې پکې شاملې وي، او کولی شي چې په هر څه چې وغواړي دعا وکړي.
• بنده باید هغه څه زده کړي چې په دنیا او آخرت کې ورته ګټه رسوي.
• بخښنې، رحمت او رزق غوښتلو ته هڅول، ځکه چې دا د ښېګڼو ټولګه ده.
• پر امت د رسول الله صلی الله علیه وسلم مهرباني چې د هغه څه زده کړې ته یې هڅوي چې ګټه ورته رسوي.
• له بخښنې وروسته د رحمت یادونه شوې تر څو سپېڅلتیا بشپړه شي، ځکه بخښنه ګناهونه پوښي، له منځه یې وړي او له جهنم څخه پکې لرې والی دی او په رحمت کې د ښېګڼو رسول او جنت ته داخلېدل دي او همدا په حقیقت کې ستره بریا ده.

په HadeethEnc.com کې یې ولولئ

رسول الله صلی الله علیه وسلم خبر ورکوي چې څوک ووايي: «زه په الله جل جلاله د رب، معبود مربي، مالک بادار او اصلاح کوونکي په توګه خوښ یم «په اسلام د دین په توګه» یعني د اسلام په ټولو حکمونو؛ که اوامر دی یا نواهي، د دین، ملت، او شریعت په توګه په عقیده او اطاعت سره منم او پرې خوښ یم «او په محمد صلی الله علیه وسلم د رسول په توګه خوښ یم» چې د هغه ټول رسالت، پیغام او لارښوونې چې موږ ته یې راوړي، په ایمان او پیروۍ سره منم؛ نو داسې انسان ته جنت واجب شوی دی.

ګټې

• د دې ذکر په ویلو ټینګار، او د هغه ثواب په اړه وضاحت چې پرې مرتبېږي.
• په الله د رب په توګه راضي کېدل دا معنا لري چې څوک له هغه سپېڅلي ذات پرته د بل چا عبادت ونه کړي.
• په محمد صلی الله علیه وسلم د نبي او رسول په توګه راضي کېدل د هغه صلی الله علیه وسلم د پيروۍ او سنت ته یې د غاړې اېښودلو معنا لري.
• په اسلام د دین په توګه راضي کېدل، په هغه څه خوښي او رضایت دی چې الله تعالی خپلو بندګانو ته غوره کړی دی.
• په اذان کې د شهادتینو اورېدو پر مهال دا دعا مستحب ده، لکه څنګه چې په نورو روایتونو کې یادونه شوې ده.
• په بل حدیث کې راغلي چې سهار او بېګا د دې دعا ویل مستحب دي.

په HadeethEnc.com کې یې ولولئ

پيغمبر - صلی الله علیه وسلم - خبر ورکوي چې ظاهري پاکوالی په اودس او غسل سره کیږي او دا چې - پاکوالی - په لمانځه کې شرط دی. او دا وینا چې " الحمد لله تله ډکوي" نو دا په الله تعالی باندې ثنا ویل دي، او د کمال په صفتونو سره د هغه - ذات - یادول د قیامت په ورځ تلل کیږي او تله ډکوي. او "سبحان الله او الحمد لله" ویل - له هرې نیمګړتیا څخه د الله تعالی د ذات پاکوالی او په بشپړ کمال سره یې یادول دي څرنګه چې د هغه د لوی شان سره ښایې؛ سره د هغه د محبت او تعظیم چې دا - د آسمان او ځمکې تر منځ - واټن - ډکوي. او دا چې لمونځ د بنده لپاره رڼا ده؛ د هغه په زړه کې، د هغه په مخ کې، د هغه په قبر کې او د هغه د بیا راپورته کېدلو پر مهال. او دا چې صدقه د مؤمن د ایمان د ریښتینولۍ او د منافق سره په توپیر درلودلو ثبوت دی، چې - منافق - یې له ورکولو ډډه کوي؛ ځکه چې په ژمنو یې باور نه لري. او دا چې "صبر ( له اضطراب او ناخوښۍ څخه ځان ساتل) رڼا ده" داسې رڼا چې د لمر د رڼا په څیر تودوخه او سوځېدنه ورسره مل وي، ځکه - صبر - سخت دی؛ له ځان سره مبارزې او له هغه څه څخه د نفس زنداني کولو ته اړتیا لري چې نفس یې غواړي؛ لدې امله صبر کوونکی تر هغه پورې په سمه لار په روښنایي کې روان دی تر څو چې صبر کوي؛ صبر - درې ډوله دی - د الله تعالی په اطاعت باندې صبر، د هغه له نافرمانۍ څخه صبر، او د دنیا په ډول ډول مصیبتونو او آفتونو صبر. او دا چې قرآن ستا لپاره حجت دی، په تلاوت کولو او پرې عمل کولو سره، او یا دا چې پر تا باندې حجت دی، د تلاوت په نه کولو او پرې عمل پرېښودلو سره. بیا رسول الله صلی الله علیه وسلم خبر ورکړ چې ټول خلک سهار مهال له خوبه پاڅیږي او د بېلابیلو کارونو لپاره له کورونو څخه وځي او په ځمکه کې خپریږي. نو ځینې لدوی څخه د الله تعالی په اطاعت ثابت قدمه پاتې شي او ځان له اور څخه آزاد کړي، او ځینې نور ترې بې لارې شي او په ګناهونو کې اخته شي نو اور ته په داخلېدلو سره ځان هلاک کړي.

ګټې

• پاکوالی په دوه ډوله دي: ظاهري پاکوالی چې په اودس او غسل کولو سره رامنځته کیږي، او باطني پاکوالی چې په توحيد، ايمان او نيکو عملونو سره رامنځته کیږي.
• په لمانځه باندې د پابندۍ اهمیت، ځکه چې دا په دنيا او د قیامت په ورځ د بنده لپاره روښنایي ده.
• صدقه د ایمان د ریښتینولۍ ثبوت دی.
• په قرآن باندې د عمل کولو او تصدیقولو اهمیت، ترڅو ستاسو لپاره دلیل شي، نه ستاسو په وړاندې.
• که نفس په اطاعت سره مشغول نه کړې، نو تاسو به په نافرمانۍ مشغول کړي.
• هر انسان باید عمل وکړي؛ نو یا خو به ځان په پيروۍ کولو سره ازاد کړي، او یا به یې په سرغړونې ( ګناه ) سره هلاک کړي.
• صبر زغم او محاسبې ته اړتیا لري او سختي ده پکې.

په HadeethEnc.com کې یې ولولئ

رسول الله صلی الله علیه وسلم خبر ورکوي چې هغه د اسراء او معراج په شپه له ابراهیم علیه السلام سره مخ شو، نو ورته یې وویل چې اې محمده! زما سلام دې امت ته ورسوه، او پوه یې کړه چې جنت ښایسته خاوره او خوږې اوبه لري چې مالګیني نه دي او دا چې جنت پراخه دی، ځمکه یې اواره ده ونې نه لري، او دا چې کښت یې پاکیزه کلمې دي هغه کلمې باقیات او صالحات دي، یعنې پاکیزه کلمې دي چې تر هغه پورې به په جنت کې وي تر څو چې ځمکه او اسمانونه وي او هغه دا دي: سُبْحَانَ اللهِ، وَالحَمْدُ لِلَّهِ، وَلاَ إِلَهَ إِلاَّ اللَّهُ، وَاللَّهُ أَكْبَرُ، نو هر کله یې چې یو مسلمان ووايي او تکرار یې کړي، په جنت کې ورته یوه (ونه) کرل کیږي.

ګټې

• د جنت د ونو د زیاتوالي لپاره په دوامداره ذکر ټینګار کول.
• د اسلامي امت فضیلت؛ چې ابراهیم علیه السلام ورته سلام راولیږه.
• د ابراهیم علیه السلام له خوا زیات ذکر کولو ته د محمد صلی الله علیه وسلم د امت هڅول.
• طیبي فرمایلي دي: جنت اواره او بې ونو ځمکه ده او بیا پکې الله تعالی په خپل فضل سره د عمل کونکو کار ته په لېدو ونې او ماڼۍ جوړې کړي دي؛ د هر عمل کونکي لپاره یې د هغه کار ته په لېدو یو څه ځانګړي کړي دي، بیا دا چې الله تعالی انسان ته هغه عمل اسانه کړی چې ورته یې پیدا کړی دی تر څو یې ثوابونه وګټې، نو انسان یې د دې ونو د کښېنوونکي په څېر ګرځولی دی.

په HadeethEnc.com کې یې ولولئ

نبي صلی الله عليه وسلم د الله تعالی له یادولو څخه د بې پروایۍ په اړه خبرداری ورکړی او ویلي یې دي چې کوم خلک چې په یوه مجلس کې ناست وي او هلته الله نه یادوي او د هغه په رسول صلی الله عليه وسلم درود نه وایي، مګر دا چې هغه مجلس به د قیامت په ورځ د دوی لپاره د پښېمانۍ، زیان او نقصان لامل وګرځي؛ نو که الله وغواړي دوی به د هغوی د پخوانیو ګناهونو او راتلونکي بې پروایۍ له امله په سزا ورسوي او که وغواړي نو په خپل فضل او رحم سره به یې وبخښي.

ګټې

• د ذکر فضیلت او ورته هڅوونه.
• د هغو مجلسونو فضیلت چې الله تعالی پکې یادېږي او د هغه په رسول صلی الله علیه وسلم پکې درود ویل کېږي، او هغه مجلسونه چې دا کارونه پکې نه کېږي، پکې د ناستو لپاره د قیامت په ورځ د بدبختۍ لامل ګرځي.
• کوم خبرداری چې د الله د یاد څخه د غفلت په اړه ورکړل شوی یوازې پر مجلسونو پورې محدود نه دی، بلکې نورو ځایونو ته هم شاملېږي، نووي ویلي: څوک چې په یو ځای کې ناسته وکړي نو د الله تعالی له یادولو پرته ورته د هغه ځای پرېښودل مکروه دي.
• په قيامت کې د دوی پښېماني خو يا: د اجر او ثواب له لاسه ورکول دي ځکه چې وخت یې د الله په اطاعت کې نه دی کارولی او يا خو ګناه او سزا ده ځکه چې وخت یې د الله تعالی په نافرمانۍ کې تېر کړی دی.
• دا خبرداری د مباحې بې پروایۍ په اړه دی، نو د هغه چا به څه حال وي چې په حرامو مجلسونو کې ګډون کوي؛ چې غیبت، چغلګري او داسې نور ګناهونه پکې کېږی.

په HadeethEnc.com کې یې ولولئ